Arzúa, 2 de xuño de 2023._O Responsábel Local do BNG en Arzúa, Manuel García, informou hoxe de que a asemblea local da organización, reunida na noite de onte xoves, acordou abrir “un proceso de negociación con Alternativa por Arzúa e PSOE para conformar un goberno liderado polo BNG, con Xoán Xesús Carril como alcalde de Arzúa” explicou.

Así, o responsábel da organización nacionalista anunciou que desde o BNG emprazaron xa a ambas formacións a manter xuntanzas nos vindeiros días e a comezar “un proceso de negociación serio e transparente”, sinalou.

Desde o BNG fan un chamamento “á responsabilidade dos outros dous grupos para garantir en Arzúa un alcalde do BNG, que faga posible a conformación dun goberno alternativo, estable e sólido para que o noso concello avance” explicou García. “Desde o BNG imos deixar a pel por traballar por Arzúa, por constituír o mellor dos gobernos e comezar a traballar desde o minuto un por abrir un tempo novo, porque iso é xustamente o que dixeron as veciñas e veciños de Arzúa o pasado domingo nas urnas” concluíu o responsábel local do BNG.