O Portavoz Municipal do BNG, Xoán Xesús Carril, lembrou esta mañá que o Servizo de Axuda no Fogar (SAF) “segue nunha situación de interinidade, pois o goberno municipal non sacou a licitación pública o novo contrato” explicou. “A contratación de emerxencia realizada polo Concello foi informada desfavorablemente tanto por parte da intervención como da secretaría,  e actualmente todas as facturas referentes ao SAF seguen saíndo con reparos” sinalou Carril. “Reclamamos que o goberno municipal saque a licitación pública o SAF, de acordo coa legalidade vixente e de maneira que se poida dar garantías e estabilidade ao servizo e ás súas usuarias e usuarios” explicou Carril.

Ademais, o portavoz nacionalista referiuse a un informe da inspección da Consellería de Política Social da Xunta de Galiza, de data do 10 de abril do 2019, no cal se apercibe ao Concello de Arzúa por mútiples e graves irregularidades en todo o que ten a ver con servizos sociais. Neste sentido, Carril sinalou que “este informe é unha emenda á totalidade ao goberno de José Luís García en materia de servizos sociais, as irregularidades que nel se aprezan son gravísimas pois estamos falando de usuarias e usuarios dun servizo fundamental para moitas familias” explicou.

Entre estas irregularidades o informe destaca que o Concello de Arzúa só estivo prestando o servizo a 33 persoas, estando un total de 67 persoas na lista de agarda, algunhas delas desde o ano 2014. Malia que o Concello dispón dun total de 2650 horas para a atención ás e aos usuarios do SAF, o goberno de José Luís García optou por non cubrilas, deixando a moitas veciñas e veciños sen servizo e só dando de alta no SAF a 3 persoas  durante os anos 2018 e 2019.

Tamén sinala o informe que o Concello de Arzúa tivo a unha usuaria recibindo menos horas das que lle correspondían malia poder prestalas, e, antes de cubrir as horas que correspondían a esta usuaria incorporou ao servizo a un novo usuario saltándose a orde de prelación establecida e xerando un trato discriminatorio entre usarias e usuarios do servizo.

Detecta tamén irregularidades nos informes de seguimento das persoas usuarias do SAF e chama a atención sobre o feito de que non existise unha persoa que execese como responsábel técnica do mesmo nin tampoco contan cunha persoa que asuma a coordinación do servizo, cuestións todas elas esixidas pola normativa vixente.

Sinala que os contratos das traballadoras sociais do Concello de Arzúa están desfasados e o seu grao de estabilidade é escaso.

En canto á garantía dos dereitos das persoas usuarias do SAF este informe chama a atención sobre o feito de que non estean expostas nin a ordenanza reguladora nin a fiscal así como a existencia dun total de 5 reclamacións que foron formuladas por usuari@s do servizo, que non foron enviadas á inspección tal e como marca a normativa.

En canto ao funcionamento dos programas de educación familiar e da Renda de Inclusión Social de Galicia (RISGA) o informe indica que non se realizou seguimento dos expedientes que figuran nestes programas e tamén constata que a documentación recollida nos mesmos está incompleta.

Desde o BNG sinlanan que “malia esta grave situación que padecen os servizos sociais no noso Concello, o goberno de AxA – PSOE optou no pasado Pleno Extraordinario, celebrado o venres 18 de outubro do 2019, por retirar diñeiro destinado a asistencia social para investilo na colocación dunha cabina para os medios de comunicación no Campo de Fútbol Municipal” explicou Carril.

“Desde o BNG pedímoslle ao Alcalde que detraera o diñeiro para facer esta obra doutas partidas que non fosen as destinadas á asistencia social. A resposta do goberno municipal foi seguir adiante, consumando o grave deterioro dos servizos sociais que vimos arrastrando no noso Concello” concluíu Carril.